AN SIYONNAJ A DIKTÉ-LA AN GWADLOUPÉYEN BAYIF
Lakonsa, nou k'ay tini pawòl-apwé omen komantasyon èvè réyaksyon a kandida èvè loréya é gangnè a konkou-maké-dikté-la ki fèt komin Bayif jédi 26 Òktòb 2017.
Pawòl a-yo ké anson (odyo) èvè anmaké (ékri).
Yo ké tin pou maké'y yomenm a-yo.
An ké mété komantasyon siyanka sa nésésè pou yo déviré korijé fòt ki té ké pé tini.
Chwa a tèks a konkou-maké-la, sé ta Man Jislèn Fauconnier, Rèskonsab a Afè a Kilti èvè Patrimwann pou komin Bayif, épi tan-mwenmenm gidonè a blòg POUSÉ OLAJ ki ka fè on travay a bayfòs é palkonduit owa komin Bayif.
Tèks a dikté-la sé TIMOUN PA PLÉRÉ.
Makèdpawòl é makèdmizik a chanté-la sé Mariyo Méri, on èspsikològ gwadloupéyen.
An ké mété dikté-la é kèksyon asi dikté-la apwé.
Dikté-la fèt anba gidonnaj a:
- Didyé Pierre Jean Flécheau (palchonjé, èvè trik pou moun té fè mwens fòt). Didyé sé on pofésè Lang é Kilti Réjyonal an komin Bayif. I ka fè on papa bèl travay menm pou lang é kilti an-nou. Asiré-pa-pétèt, sa ka pòté Bayif onlo.
- Paskal Jarvis (korèksyon, kontapawòl asi fòt moun fè épi lidé-annaks pou moun pa woufè sé menm fòt-lasa ankò). An sé on pofésè anglé é on makèliv. An maké liv Molakòl (on liv asi konèktè lojik ki tini an fwansé èvè an gwadloupéyen). An tin tèks osi adan Bwa Pou Nou Alé, on sanblaj tèks Silvyàn Telchid té òwganizé.
An prézanté moun nichtwèl (sit entèwnèt) http//:www.wabap.com a misyé Èktò Poullet davwa silon mwen sé on zouti-filé.
An sèvi èvè'y pou ba moun anvi é labitid fè'y sèvi. Fè'y sèvi pou dévoplé kapasité oben pésité a yo travay tousèl dépawfwa é souvantfwa.
Annou woulé aprézan...